Argentina vise-prezidenti Viktoriya Vilyarruyel Jahon chempionati yarimfinalida Angliyaga qarshi kechadigan bahs oldidan raqiblarni “bosqinchi qaroqchilar” deya ta’rifladi. Bu bayonot ikki davlat o‘rtasidagi uzoq yillik hududiy nizo fonida yangradi.

“Biz bosqinchi qaroqchilarga qarshi o‘ynaymiz. Bu shunchaki navbatdagi o‘yin emas. Men siyosiy jihatdan bosiq bo‘lishni yoki sovuqqonlikni saqlashni xohlamayman. Inglizlarga qarshi bahslar doim qandaydir kattaroq ahamiyat kasb etgan. Bu — Malvin (Folklend) orollari, bu — Diyego, bu — Leoning so‘nggi urinishi va bu — bosqinchilarni o‘z joyiga o‘tkazib qo‘yish imkoniyatidir”, deydi vise-prezident.

Shuningdek, u argentinalik muxlislar tomonidan turnir davomida kuylanayotgan mashhur chorlovni ham eslatib o‘tdi: “Olg‘a, Argentina! Toki so‘nggi nafasimiz qolgunicha, o‘zimizga tegishli bo‘lgan narsani talab qilishda davom etamiz!”

Qayd etish joizki, Viktoriya Vilyarruyelning otasi 1982-yilda Argentina va Buyuk Britaniya o‘rtasida Janubiy Atlantika orollari uchun kechgan Folklend urushida qatnashgan. 74 kun davom etgan va britaniyaliklarning g‘alabasi bilan yakunlangan to‘qnashuvlarda 655 nafar argentinalik va 255 nafar britaniyalik harbiylar halok bo‘lgan. Ushbu hududning suverenitet masalasi hamon bahsli bo‘lib qolmoqda.

Ma’lumot uchun, Jahon chempionati yarimfinal bahsida Argentina Angliyani 2:1 hisobida mag‘lub etib, final yo‘llanmasiga ega chiqdi. Hal qiluvchi uchrashuv 19-iyuldan 20-iyulga o‘tar kechasi, O‘zbekiston vaqti bilan roppa-rosa 00:00 da start oladi.