Футбол бўйича Ўзбекистон Суперлигасининг 12-тури доирасида турнинг марказий учрашуви бўлиб ўтади. Унда турнир жадвалининг юқори қисми учун курашаётган «Навбаҳор» ҳамда ОКМК жамоалари ўзаро майдонга тушади.

Жамоаларнинг жорий мавсумдаги ҳолати ва имкониятлари турлича бўлса-да, бугунги баҳс иккала клуб учун ҳам турнир жадвалидаги позиция нуқтаи назаридан жуда катта аҳамиятга эга.

Айни пайтда наманганликлар 11 та ўйиндан сўнг 20 очко жамғарган ҳолда 4-ўринни эгаллаб турибди. Темур Кападзе шогирдлари 6 та учрашувда ғалаба қозониб, совринли ўринлар учун кураш олиб бормоқда.

ОКМК эса 11 та учрашувда 16 очко тўплаган ҳолда 8-поғонадан жой олган. Миржалол Қосимов жамоаси ҳисобида 4 та ғалаба мавжуд ва олмалиқликлар Намангандаги баҳс орқали кучли учликка яқинлашиб олишни мақсад қилган.

Статистика нима дейди?

«Навбаҳор» ўз майдонида ўтган сўнгги 6 та учрашувда ОКМКга имкониятни бой бермаган. Олмалиқ клуби Намангандан сўнгги бор 2019 йилда ғалаба билан қайтган эди.

Бугунги баҳсда «Навбаҳор» зафар қучиб, 3-ўринга кўтариладими ёки ОКМК кўп йиллик нохуш сериясига чек қўйиб, муҳим 3 очкони қўлга киритадими? Бу саволга бугун соат 20:00 да старт оладиган учрашувда жавоб топилади.