Лондоннинг «Арсенал» клуби ҳужумчиси Габриэль Жезус «Милан»нинг трансфер мақсадлари рўйхатида қолмоқда.
«Россонерилар» узоқ вақтдан бери бразилиялик футболчига асосий даъвогарлардан бири сифатида тилга олинади, бироқ ҳозирча «канонирлар» билан трансфер шартлари бўйича келиша олмаяпти. Sport Witness хабарига кўра, «Арсенал» форвард учун аввалгидек 23 миллион евро атрофида маблағ сўрамоқда, аммо «Милан» бу нархни ошириб юборилган деб ҳисоблайди ва лондонликларни ўз талабларини пасайтиришга кўндирмоқчи.
Transfermarkt версиясига кўра, Габриэль Жезуснинг бозор қиймати 17 миллион еврони ташкил этади. 29 ёшли футболчининг амалдаги шартномаси бир йилдан сўнг якунига етади ва унинг узайтирилиши даргумон.
