Халқаро спорт матбуоти ассоциацияси (AIPS) талқинига кўра, Жаҳон чемпионати–2026нинг энг яхши футболчиси деб Аргентина терма жамоаси сардори Лионель Месси топилди.

Овоз беришда 121 мамлакатдан 472 нафар спорт журналисти иштирок этди. Якунларга кўра, 39 ёшли аргентиналик 1179 очко тўплади. Месси мусобақани 8 та гол билан якунлаб, турнир тўпурарлари рўйхатида иккинчи ўринни эгаллади.

Иккинчи ўринни 717 очко жамғарган Франция терма жамоаси ҳужумчиси Килиан Мбаппе эгаллади. У мусобақада 10 та гол уриб, Жаҳон чемпионатининг энг яхши тўпурари бўлди.

Учинчи поғонадан Англия терма жамоаси ярим ҳимоячиси Жуд Беллингем жой олди. У 470 очко тўплади.

Тўртинчи ўринни Норвегия вакили Эрлинг Холанд (460 очко), бешинчи ўринни эса Испания терма жамоаси футболчиси Ламин Ямал (304) эгаллади. Турнирнинг расман энг яхши футболчиси деб топилган Родри (Испания) 285 очко билан олтинчи, Кабо-Верде терма жамоаси дарвозабони Возинья эса 189 очко билан еттинчи бўлди.

Кучли ўнликдан шунингдек Англия вакили Харри Кейн (130), Испания ҳужумчиси Микель Оярсабаль (118) ва Франция терма жамоаси футболчиси Майкл Олисе (91) ҳам ўрин олди.

Эслатиб ўтамиз, Жаҳон чемпионати–2026 финалида Испания Аргентинани 1:0 ҳисобида мағлуб этиб, жаҳон чемпиони бўлган эди.