Италияда спорт журналисти Лука Эспозито шафқатсизларча ўлдирилди.
18 июлдан 19 июлга ўтар кечаси Эболи атрофидаги қишлоқ жойида содир бўлган ёнғинни ўчиришга келган ўт ўчирувчилар 53 ёшли журналистнинг куйиб кетган жасадини топдилар.
Rai хабарига кўра, Эспозито ҳалок бўлган жойдан бир нечта гильза топилган, бироқ кейинги ёриб кўриш жараёнида ўқ отар қуролдан етказилган жароҳат белгилари аниқланмаган. Терговнинг тахмин қилишича, журналист шафқатсизларча калтакланган, натижада унинг бир нечта суяклари синган ва шундан сўнг унга ўт қўйиб юборилган. Марҳумнинг шахсини фақат ҳодиса жойи яқинида тўхтатилган ва Эспозито номига рўйхатдан ўтказилган автомобиль туфайли аниқлашга эришилди.
Ҳозирда тергов жиноят қуролини қидирмоқда, шунингдек, йўлдаги камералар ёзувларини тўплаган ҳолда, Эспозито автомобилининг қотиллик содир бўлган жойгача бўлган йўналишини аниқламоқда. Йўналишнинг бир қисмида кузатув камералари йўқлиги қайд этилган. Бундан ташқари, полиция журналистнинг касбий фаолияти ва шахсий ҳаёти тафсилотларини қайта тиклаган ҳолда, қотилликнинг эҳтимолий мотивларини аниқлашга ҳаракат қилмоқда.
