Аргентинанинг «Ривер Плейт» клуби ёзги трансфер ойнасидаги энг шов-шувли келишувлардан бирини амалга оширишга яқин турибди. Клуб 2022 йилги жаҳон чемпиони Анхель Корреа трансфери бўйича тўлиқ келишувга эришди.

Таниқли инсайдер Фабрицио Романо хабарига кўра, 31 ёшли аргентиналик ҳужумчи «Ривер Плейт» билан 2029 йилнинг июн охиригача амал қилувчи узоқ муддатли шартнома шартларини қабул қилган.

Аргентина клуби марказий ҳужумчи, иккинчи ҳужумчи ҳамда қанотларда ўйнай оладиган серқирра футболчининг трансфери учун Мексиканинг «Тигрес» клубига тахминан 15-17 миллион доллар атрофида тўловни амалга оширади.

Шу тариқа, фаолиятининг катта қисмини хорижда (жумладан, Мадриднинг «Атлетико» ва «Тигрес» клубларида) ўтказган Корреа яна Аргентина футболига қайтмоқда. Қатарда ўтказилган ЖЧ-2022 мусобақасида Аргентина терма жамоаси сафида олтин медалларни қўлга киритган тажрибали ҳужумчи «Ривер Плейт»нинг ҳужум чизиғини сезиларли даражада кучайтириши кутилмоқда.