Дортмунднинг «Боруссия» клуби «Кёльн»нинг ҳужумкор ярим ҳимоячиси Саид Эль-Мала бўйича таклиф билан чиқди, бироқ Германия клуби 19 ёшли футболчини ўз сафига қўшиб олишга бўлган уринишни дарҳол рад этди. Бу ҳақда Sky хабар бермоқда.
«Боруссия» ўтган ҳафтада «Кёльн»га кафолатланган 26 миллион евролик таклиф юборган эди. Бундан ташқари, шартномага бонуслар ҳам киритилган бўлиб, улар эвазига битимнинг потенциал қиймати 34 миллиондан 42 миллион еврогача етиши мумкин эди.
«Кёльн»да бу таклиф ажабланиш уйғотди ва деярли дарҳол рад этилди. Клуб Германиянинг энг истиқболли ёш ўйинчиларидан бири учун анча кўпроқ маблағ олишни режалаштирмоқда. Аввалроқ «Кёльн» Англиянинг «Брентфорд» клуби томонидан берилган 50 миллион евролик таклифга рози бўлган эди, бироқ Эль-Маланинг ўзи АПЛ клубига ўтишни рад этганди.
Футболчининг «Кёльн» таркибида қолиши ҳам ҳақиқатга яқин сценарий бўлиб турибди. Эль-Маланинг клуб билан амалдаги шартномаси 2030 йилгача мўлжалланган.
