«Ювентус» форвард Душан Влахович билан музокараларни давом эттирмоқда. Сербиялик футболчи аввалроқ ўзини жамоадаги энг кўп маош олувчи ўйинчига айлантириши мумкин бўлган икки йиллик шартномани рад этган эди.
Душан Влаховичнинг «Ювентус»даги келажаги атрофидаги вазият кескин ўзгарди. Агар илгари Турин клуби ҳужумчини олиб қолиш учун ён беришларга рози бўлган бўлса, энди ташаббус «бьянконери» томонида ва агар сербиялик форвард жамоада қолишни истаса, клуб шартларини қабул қилишига тўғри келади. Tuttomercatoweb хабарига кўра, Влаҳович 3 июнь куни «Ювентус»нинг янги икки йиллик шартнома ҳақидаги таклифини рад этганидан сўнг томонлар ўртасидаги музокаралар берк кўчага кириб қолган. Сербиялик футболчига таклиф қилинган келишув бир мавсум учун 7 миллион евродан ортиқ маошни кўзда тутган эди. Бу уни жамоадаги энг юқори маош олувчи ўйинчига айлантириши ҳамда шартнома имзолангани учун каттагина бонус келтириши мумкин эди.
Бироқ ҳужумчи «йўқ» деб жавоб берди. У Европадаги топ-клублардан янада манфаатлироқ таклифлар топишига ишонган эди. Аммо Влаховичнинг кутилмалари ўзини оқламади. Топ-5 Европа лигалари грандлари томонидан реал қизиқиш бўлмади. Юқори даражада фаолиятини давом эттириш учун вариантлар унчалик кўп эмаслигини тушуниб етган форвард «Ювентус» билан музокараларга қайтишга уринди, аммо клубнинг қатъий позициясига дуч келди.
Энди «Кекса синьора» раҳбарияти ўз шартларини ўтказмоқда. Манба хабарига кўра, «Ювентус» энди Влаховичга шартнома имзолангани учун бериладиган бонусни таклиф қилмоқчи эмас. Бундан ташқари, клуб энди сербиялик футболчига йилига 6 миллион евро тўлашга тайёр. Бу эса Кенан Йилдиз олаётган маошдан ҳам камроқдир.
