Мексика терма жамоасининг собиқ дарвозабони Гильермо Очоа миллий терма жамоанинг янги устози Рафаэль Маркеснинг мураббийлар штабидан жой олиш таклифини рад этди. Бу ҳақда All Futbol MX аккаунти X ижтимоий тармоғида маълум қилди.
Манба хабарига кўра, Очоа ёш футболчиларни аниқлаш ва кузатиб боришга ёрдам берадиган ягона маълумотлар базасини яратиш бўйича Халқаро футбол федерацияси (ФИФА) билан ҳамкорлик қилишни режалаштирмоқда. Бу орқали ёш иқтидорларда скаутлар эътиборига тушиш имконияти пайдо бўлади.
Аввалроқ Очоа футболчилик фаолиятини якунлаганини эълон қилган эди. Клуб даражасида дарвозабон «Америка» билан Клаусура-2005 турнирида чемпионликни ва Бельгиянинг «Стандард» клуби таркибида Бельгия кубогини қўлга киритган. Халқаро майдонда эса Мексика терма жамоаси билан олти марта КОНКАКАФ Олтин кубогида зафар кучган ва Токио-2020 Олимпиада ўйинларининг бронза медали соҳибига айланган.
