Бразилия миллий терма жамоаси бош мураббийи Карло Анчелотти ўз лавозимида ишини давом эттиради. Бу ҳақда таниқли инсайдер Фабрицио Романо ўзининг ижтимоий тармоқлардаги саҳифаларида хабар берган.
Манбага кўра, 67 ёшли италиялик мутахассис бразилияликларни 2028-йилги Америка Кубоги ва 2030-йилги Жаҳон чемпионатига қадар бошқаришни режалаштирмоқда.
Маълумот учун, Анчелотти жамоани 2025-йилнинг май ойида қабул қилиб олган эди. У ушбу Жаҳон чемпионати бошланишидан аввалроқ Бразилия футбол конфедерацияси билан амалдаги шартномасини 2030-йилгача узайтирган. Эслатиб ўтамиз, бразилияликлар мундиалнинг 1/8 финалида Норвегияга 1:2 ҳисобида имкониятни бой берди ва сўнгги 36 йил ичида илк бор мусобақанинг чорак финалига чиқа олмади.
Шунингдек, оммавий ахборот воситалари тарқатган хабарларга кўра, аввалроқ Италия футбол федерацияси Анчелоттига ўз миллий терма жамоасини тайёрлаш таклифи билан чиққан. Бироқ мураббий бу вариантни рад этган.
