Аргентина терма жамоаси сардори Лионель Мессининг аждодлари орасида Бразилия билан боғлиқ илдизлар аниқланди. Бу ҳақда Globo нашри италиялик тарихчи Фьоренцо Сантинининг тадқиқотига таяниб хабар берди. Олим футболчининг шажарасини уч йилдан ортиқ вақт давомида ўрганган.
Тадқиқотга кўра, Мессининг она томонидан катта боболаридан бири — Федерико Куччиттини 1904 йил 27 январда Бразилиянинг Сан-Паулу штатидаги Рибейран-Прету шаҳрида туғилган. Унинг ота-онаси — италиялик Раньеро Коччеттини ва Роза Риккецца 1899 йили Washington кемасида Бразилияга келиб, Сан-Паулу штати қишлоқ ҳудудидаги фермаларда меҳнат қилган.
Тарихчининг таъкидлашича, оиланинг фамилияси айнан Бразилияда ўзгарган. Рўйхатдан ўтказиш вақтида Ардериго Коччеттинига Федерико исми берилган, Coccettini фамилияси эса Cuccittini кўринишига ўзгартирилган. Кейинчалик айнан шу фамилияни Мессининг онаси Селия Мария Куччиттини ҳам олган.
Федерико туғилганидан бир йил ўтиб, оила Аргентинанинг Росарио шаҳрига кўчиб ўтган. Кейинчалик шу ерда футболчининг бобоси Антонио Куччиттини ва ортидан Лионель Мессининг ўзи дунёга келган.
Сантинининг айтишича, у Месси оиласи тарихини футболчи «Барселона»да эндигина порлай бошлаган пайтларда ўрганишга киришган. Тадқиқот 2019–2022 йилларда олиб борилган ва натижада Мессининг она томонидан шажараси қайта тикланган. Тарихчига кўра, Италияда деярли учрамайдиган Cuccittini фамилияси оиланинг Бразилия билан боғлиқлигини аниқлашга ёрдам берган.
Қайд этилишича, ҳозирда Мессининг қариндошлари Бразилияда яшамайди. Оила 1905 йилдаёқ бу мамлакатни тарк этиб, Аргентинага кўчиб ўтган.
