Суперлига стадионларини Президент қарори асосида трансляциялар учун интеграциялашган кабеллаштириш ишлари давом этмоқда. Мазкур масалани биринчилардан бўлиб Фарғонадаги «Истиқлол» стадиони ҳал қилганди. Эндиликда улар қаторига Олмалиқ ва Урганч шаҳарларидаги стадионлар ҳам қўшилди.
Суперлиганинг 14-тури доирасида ОКМК 27 июль куни «Машъал» клубини қабул қилади. Эртасига — 28 июль куни Урганчда «Сурхон» меҳмон бўлади. Мана шу учрашувлар трансляцияси давомида Лига МТРК билан ҳамкорликда мазкур жараён якунларини синовдан ўтказиб олади.
Маълумот учун, айни вақтда Нукус шаҳридаги «Турон» стадионида ҳам кабеллаштириш ишлари якунига етган бўлиб, Лига кейинчалик бу ҳақда алоҳида маълумот беради. Шунингдек, Наманган ва Қарши шаҳарларидаги «Марказий» стадионларда бу борада амалий ишлар бошланган.
