Украина футбол ассоциацияси (УАФ) собиқ президенти Андрей Павелко Братиславада қўлга олинди. Украина Бош прокуратураси уни экстрадиция қилиш жараёнини бошлади, бу ҳақда Украина бош прокурори Руслан Кравченко ўз Telegram-каналида маълум қилди.
"У йиллар давомида Украина одил судловидан яшириниб келаётган эди. Бош прокуратура офиси аллақачон экстрадиция жараёнини бошлади. Мен Словакиянинг ваколатли органларига ушбу шахсни топшириш бўйича сўров юбориш нияти, шунингдек, вақтинчалик ҳибсга олишни қўллаш ҳақида хат юбордим", — деб ёзди Кравченко.
Тергов маълумотларига кўра, Павелко ўзига бўйсунувчи тижорат тузилмалари орқали УАФнинг йирик миқдордаги пул маблағларини олиб чиқиб кетиш схемасини ташкил этган. Бунинг учун фақат қоғозда мавжуд бўлган денгиз маҳсулотлари, элит чой ва қаҳва навлари ҳамда электр жиҳозларини етказиб бериш бўйича сохта шартномалар тузилган. Пуллар олиб чиқиб кетилган, УАФ ва унинг ҳудудий марказлари эса кўп миллионлик зарар кўрган.
Павелко УАФга 2015 йилнинг мартидан 2024 йилнинг январь ойига қадар раҳбарлик қилган. 2022 йилнинг ноябридан бери у футбол майдонлари учун сунъий қоплама ишлаб чиқариш завод қурилишидаги маблағларни ўзлаштириш бўйича жиноят ишида айбланувчи сифатида қатнашмоқда.
2023 йилнинг июнидан 2024 йилнинг февралига қадар Павелко ҳибсда сақланган, шундан сўнг тергов ҳибсхонасидан чиқиб, Украинани тарк этган. 2025 йилнинг декабрь ойида Украина ИИВ уни қидирувга берган эди.
