Ўзбекистон футбол ассоциацияси Футболчилар мақоми ва ўтиши бўйича қўмитаси қарорига асосан, «Навбаҳор» ҳамда БухДУ футбол клубларига нисбатан трансфер тақиқи қўлланилди.
Маълум қилинишича, мазкур клублар қўмита томонидан аввал қабул қилинган қарорларда белгиланган муддатларда футболчилар ва бошқа клублар олдидаги молиявий мажбуриятларини бажармаган.
Шу муносабат билан, Ўзбекистон футбол ассоциациясининг Футболчилар мақоми ва трансфери тўғрисидаги регламентининг 12bis-моддаси талабларига мувофиқ, ҳар икки клубга кетма-кет икки рўйхатдан ўтказиш даври мобайнида миллий ва халқаро миқёсда янги футболчиларни Ўзбекистон Профессионал футбол лигасида рўйхатдан ўтказиш тақиқланди.
Футболчилар мақоми ва ўтиши бўйича қўмита клубларни қабул қилинган қарорларни тўлиқ бажаришга чақирди. Шунингдек, молиявий мажбуриятлар белгиланган тартибда адо этилмаган тақдирда, уларга нисбатан янада оғирроқ интизомий санкциялар қўлланилиши мумкинлиги ҳақида огоҳлантирилди.
