Британиялик журналист ва «Арсенал»нинг ашаддий мухлиси Пирс Морган клуб мураббийлар штаби ва раҳбариятига мурожаат қилиб, таркибни қатъият билан кучайтиришга чақирди.
«Жорий трансфер ойнасида Микель Артета ва спорт директори Бертага ягона тилагим — заррача иккиланмасдан ҳаракат қилиш. Биз дунёнинг энг рақобатбардош лигаси чемпионларимиз, демак, шунга муносиб йўл тутишимиз ва энг юқори даражадаги футболчиларни жалб қилишимиз шарт», — деб ёзди Морган ижтимоий тармоқларда.
Ўтган мавсум якунларига кўра, «Арсенал» АПЛ турнир жадвалида 85 очко жамғариб, биринчи ўринни эгаллади. Клуб орадан 20 йил ўтиб илк бор олтин медалларни қўлга киритди. Лондонликлар учун Англия чемпионатининг янги мавсуми 21 август куни бошланади. Шу куни «канонирлар» ўз майдонида «Ковентри»ни қабул қилишади.
