Норвегиянинг «Будё-Глимт» клуби ҳужумчиси Каспер Хёг яқин 24 соат ичида «Селтик»га ўтиш олдидан тиббий кўрикдан ўтиши керак. Бу ҳақда «Милан» билан ўртоқлик ўйинидан (2:2) сўнг Шотландия клуби бош мураббийи Мартин О'Нил маълум қилди.
BBC маълумотларига кўра, «Селтик» Норвегия клуби билан 25 ёшли форварднинг трансфери бўйича 12,7 миллион еврога келишиб олган, бу эса Шотландия чемпиони тарихидаги рекорд келишувга айланиши мумкин.
«Умид қиламанки, бу трансфер амалга ошади. Менимча, имкониятлар жуда юқори. Аммо барча ҳужжатларга узил-кесил имзо чекилмагунича, баъзи масалалар очиқ қолиши мумкин. Шунга қарамай, жараён аниқ олдинга силжимоқда», — деди О'Нил.
Ўтган мавсумда Хёг «Будё-Глимт»нинг асосий футболчиларидан бирига айланди ва жамоа билан Чемпионлар лигасининг 1/8 финалигача етиб борди. Ҳужумчи Дания терма жамоаси сафида 4 та ўйин ўтказган.
