Хулиан Альварес Англия Премьер-лигасида пайдо бўлиши мумкин — «Арсенал» аргентиналик футболчини ўз сафига қўшиб олишга ҳаракат қилиши кутилмоқда. Marca нашри саҳифаларида Альвареснинг келажагига бағишланган мақола чоп этилди. Материалда таъкидланишича, «Арсенал» Альварес учун 100 миллион евро ва Виктор Дьёкерешни таклиф қилишга тайёр.
«Атлетико» 26 ёшли Альваресни жамоада сақлаб қолиш ниятида, аммо гап Испаниядан ташқаридаги клубга трансфер қилиш ҳақида кетса, мадридликлар музокаралар учун очиқ бўлишлари мумкин.
Аввалроқ Хулиан Альварес «Барселона»га ўтишни хоҳлашига шама қилган эди. «Атлетико» эса, афтидан, форвардни «кўк-анорранглилар»га сотиш кайфиятида эмас.
