«Реал» эртага Ян Диоманде трансферини эълон қилиши мумкин.
Олдинроқ Мадрид клуби Кот-д′Ивуар терма жамоасининг 19 ёшли вингери трансфери бўйича «РБ Лейпциг» билан принципиал келишувга эришгани хабар қилинган эди.
As нашрининг маълумотларига кўра, «Реал» Диоманде учун 115–120 миллион евро тўлайди. Битим яқин соатлар ичида якунланиши ва трансфер ҳақидаги расмий эълон душанба куниданоқ чиқиши кутилмоқда.
Таъкидланишича, Диоманденинг манфаатларини «Реал» вингери Винисиус Жуниор мижози бўлган ўша агентлик ҳимоя қилади. Шу сабабли клуб ивуарлик футболчининг агентлари билан тезда келишиб олишга эришди.
Диоманде 2025 йилнинг ёзидан бери «РБ Лейпциг» сафида тўп суриб келмоқда. Бундеслигадаги дебют мавсумида вингер ўз ҳисобига 12 та гол ва 8 та голли узатма ёзиб қўйди.
