Ашхобод шаҳрида давом этаётган Туркманистон президенти кубоги мусобақасида гуруҳ босқичининг 3-тур ўйинлари бўлиб ўтди. Унда иштирок этаётган "Пахтакор"нинг 1997 йилда таваллуд топган футболчиларидан иборат жамоаси россиялик ёшларга қарши баҳс  олиб боришди.

Ўйин тақдири биринчи бўлимда ҳал бўлди. 22-дақиқада Артур Гридчин жаримадан ҳисобни очган бўлса, биринчи бўлимга қўшиб берилган компенсация вақтида Владислав Сарвели россияликларнинг иккинчи голини киритди.

Шунга қарамай, Жасур Абдураимов шогирдлари мусобақанинг ярим финалига чиқишди. Улар 17 сентябрь куни "Ашхобод" стадионида Туркманистон ўсмирлар терма жамоасига қарши баҳс олиб борадилар. Ўйин 17:00да бошланади. Россия ва Қирғизистон ўсмирлари ўртасидаги иккинчи ярим финал ўйини эса 10:00да старт олади.

Туркманистон президенти кубоги мусобақаси мукофот жамғармасига эга бўлиб, ғолиб 20 минг долларни қўлга киритса, финалчига 10 минг доллар топширилади. Учинчи ўринни эгаллаган жамоага эса 5 минг доллар насиб этади.