Франция терма жамоасининг собиқ ярим ҳимоячиси Матьё Вальбуэна Мальта иккинчи дивизионининг «Санта-Лучия» клуби футболчисига айланди. 41 ёшли футболчи билан шартнома имзоланганини Мальта жамоаси матбуот хизмати ижтимоий тармоқда маълум қилди.

Вальбуэна янги клуби қароргоҳига етиб келди ва янги аъзо сифатида тақдимот маросимида иштирок этди. Тажрибали футболчи ўтган мавсумни Грециянинг «Олимпиакос» клуби иккинчи жамоаси таркибида ўтказиб, 11 та ўйинда учта гол урди ва тўртта голли узатмага муаллифлик қилди.

Илгари Вальбуэна «Марсель», «Динамо», «Лион» ва «Фенербахче» каби клубларда тўп сурган. Франция терма жамоаси сафида у 58 та ўйин ўтказиб, саккизта гол урган ва 20 та голли узатмани амалга оширган.