Ўзбекистон Профессионал футбол лигаси раҳбарлиги учун навбатдаги тўрт йиллик муддатга номзодларни тасдиқлаш масаласи кун тартибига киритилди. Бу ҳақда ташкилот матбуот хизмати маълум қилди.

Лига Уставининг 5.11-бандига мувофиқ, бош директорни тўрт йил муддатга тайинлаш ҳамда лавозимидан озод қилиш Ўзбекистон футбол ассоциацияси президенти ёки Ассоциация Ижроия қўмитасининг тақдимномасига асосан ПФЛ Ижроия қўмитаси томонидан амалга оширилади.

Эслатиб ўтамиз, Ассоциация президентининг тақдимига биноан, Ижроия қўмитанинг 2022 йил 31 мартдаги қарори билан Диёр Имомхўжаев тўрт йил муддатга ПФЛ бош директори этиб тасдиқланган эди. Эндиликда Ассоциация раҳбарияти ёки Ижроия қўмитаси навбатдаги тўрт йиллик давр учун номзод ёки номзодларни тақдим этиши лозим. Шундан келиб чиқиб, Лига мазкур масалани кун тартибига киритишни сўраб мурожаат қилди.

Қайд этилишича, Диёр Имомхўжаев бир вақтнинг ўзида ҳар иккала ташкилот Ижроия қўмитаси аъзоси ҳисобланади. Шу боис у номзод тақдим этишда ҳам, кейинчалик овоз бериш жараёнида ҳам иштирок этмайди. Уставига кўра, Ассоциация бир ёки бир нечта номзодлар рўйхатини тақдим этиши мумкин, улар эса Лига Ижроия қўмитасининг 8 нафар аъзоси томонидан овоз бериш йўли билан сайланади. Овоз бериш ҳақиқий деб топилиши учун камида 5 нафар аъзо қатнашиши шарт.

Муҳим жиҳати, Ижроия қўмита аъзоларининг 5 нафари футбол клублари вакиллари ҳисобланади (Алишер Юсупов — «Насаф», Баҳодир Мирзаев — ОКМК, Тўлабек Акрамов — «Локомотив», Элбек Саматов — «Андижон», Мақсад Каримов — «Хоразм»). Шунингдек, қўмитага Одил Аҳмедов, Камолиддин Мурзоев ва Ойбек Иброҳимхонов ҳам аъзо саналади.

Шу тариқа, ПФЛ бош директорини сайлашда клубларнинг умумий овози ҳал қилувчи ҳисобланади. Ассоциация томонидан тақдим этиладиган номзодлар рўйхати ҳақида кейинроқ қўшимча маълумот берилиши кутилмоқда.