Райан Гравенберх «Ливерпуль»нинг АҚШдаги мавсум олди йиғинига келиб қўшилгач, жамоанинг янги бош мураббийи Андони Ираола қўл остида ишлашни интиқлик билан кутаётганини айтди.

Нидерландия терма жамоаси сафида Жаҳон чемпионатида иштирок этган ярим ҳимоячи дам олиш кунлари таркибга қўшилди ва Ираола ҳамда унинг мураббийлар штаби томонидан тақдим этилган янги ғоялардан ҳайратда қолганини яширмади.

«Ҳа, бу жараённи чиндан ҳам интиқлик билан кутяпман. У илгари сураётган тамойиллар, ўйин темпи ва аввалги клубида амалга оширган ишлари таҳсинга лойиқ. Шу боис, у жамоамизга олиб кирадиган янгиликларни интизорлик билан кутмоқдаман», — деди у.

24 ёшли футболчи испаниялик мураббийнинг «Борнмут»даги фаолиятини ҳам эътироф этиб, у ерда жамоани АПЛнинг грандларига қарши муносиб кураша оладиган даражага олиб чиққанини таъкидлади.

«Унинг иши менда катта таассурот қолдирган. Назаримда, ўтган мавсумда улар турнир жадвалида биздан кейинги ўринни эгаллашди. «Борнмут»даги меҳнати чиндан ҳам таҳсинга сазовор. Уларга қарши ўйинларимиз ҳамиша оғир кечарди. У жуда яхши ишлади ва умид қиламанки, бу ерда ҳам шундай муваффақиятга эришади», — деди Гравенберх.

Шунингдек, Гравенберх Ираола келганидан сўнг жамоадаги муҳит ижобий томонга ўзгарганини ва футболчиларга янги машғулотларнинг юқори суръати ҳамда сифати манзур келаётганини алоҳида қайд этди.

«Менимча, ҳамма хурсанд ва бу ерда эканидан мамнун. Бир нечта йигитлар билан гаплашдим, улар машғулотлар жуда қизиқарли ва интенсив кечаётганини айтишди. Қисқаси, ҳамманинг шашти баланд», — дея қўшимча қилди футболчи.