«Реал»нинг собиқ дарвозабони Санти Каньисарес «қироллик клуби»нинг Бразилия терма жамоаси вингери Винисиус Жуниор билан шартномани узайтириш бўйича олиб бораётган музокараларини кескин танқид қилди.

Бразилиялик футболчининг амалдаги шартномаси 2027 йилнинг июнь ойигача мўлжалланган, аммо томонлар ўртасида келишувни узайтириш бўйича ҳалигача бир тўхтамга келингани йўқ. «Арсенал» томонидан бўлаётган қизиқишлар ҳамда Ян Диоманденинг эҳтимолий трансфери ҳақидаги хабарлар футболчининг келажаги атрофидаги шубҳаларни янада оширмоқда.

Cadena COPE радиоканалининг Tiempo de Juego кўрсатувида чиқиш қилган собиқ посбон Мадрид клуби бу вазиятни анча олдин ҳал қилиши керак эди деб ҳисобламоқда.

«Реал» ҳамма нарсага кечикмоқда. Агар уларнинг қўлида имзоланган келишув бўлмаса, клуб уни сотишга мажбур. 100 миллион ёки ундан ортиқ маблағни шунчаки шартнома муддати тугашини кутиб, текинга бой бериш мумкин эмас. Бу кечириб бўлмайдиган даражадаги омадсиз бошқарувдир», — деди Канисарес.

Шу билан бирга, собиқ футболчи бразилиялик атрофидаги турли хабарлар ва шов-шувлар унинг Мадриддан кетишга яқин эканини англатмаслигини ҳам таъкидлади.

«Футболчи атрофида қанчалик кўп шов-шув кўтарилса, унинг жамоадан кетиш эҳтимоли шунчалик пасаяди», — дея хулоса қилди у.