"Металлург" - "Гулистон" учрашувидан кейин меҳмонлар бош мураббийи Бахтиёр Ашурматовни суҳбатга тортиш қийин бўлган эрса-да, мухлисларни қизиқтирган бир икки саволларга жавоб олдик.

— Бугунги ўйин ҳақида фикрларингиз?
— Учрашувнинг оғир кечишини олдиндан кутгандик. “Гулистон”нинг айни пайтдаги аҳволини ҳамма яхши билади. Турли муаммолар боис биринчи даврадаги таркибга бир қатор ўзгартиришлар киритишга мажбур бўлдик. Янги таркибни шакллантириш учун эса вақт керак ҳамда биринчи навбатда маблағ зарур. Аммо бизда на униси бор, на буниси. “Металлург” эса лиганинг кучли жамоаларидан бири. Айниқса бекободликлар ўз майдонларида унча-мунча клубларга ўйин бермайди. Биринчи таймда мезбонларнинг хотиржамликка берилишидан фойдаланиб, ҳисобда олдинга ўтиб олгандик. Иккинчи бўлимда эса ҳаммаси ўз изига тушди. Майдон эгалари ҳужумни кучайтирди. Бизда эса ҳимоя чизиғи ва биринчи навбатда дарвозабонимиз ишончсиз ўйнади. Айнан уларнинг хатолари эвазига мағлубиятга учрадик.

— Одатда ғалаба қозонаётган жамоа таркибни алмаштирмайди. Иккинчи тайм бошидаги ўйинчи алмаштиришларни қандай изоҳлайсиз?
— Элёр Жаҳонов жароҳат билан ўйнаётганди, танаффусдан кейин уни алмаштиришга мажбур бўлдик. Ҳасанов эса биринчи тайм охиридаги тўқнашувдан кейиноқ алмаштиришимизни сўраганди. Ҳар иккала ўзгариш мажбурий бўлди дейиш мумкин.

— Жамоа ўйинини ниманинг эвазига ўзгартирмоқчисизлар?
— Бошим қотган. Гулистонда футбол гўё битта менга керакдай. Агар “Шўртан” ва “Қизилқум” сўнгги турлардагидек очко жамғаришда давом этса, бизнинг захирамиз ҳеч нарса бўлмай қолади ва “Гулистон” кучлилар сафини тарк этиши мумкин. Давралар оралиғида таклиф этган бир икки ўйинчиларимиз ҳозирда иштиёқлари эвазига жон койитишяпти. Агар вазият ўзгармаса уларнинг ҳам ҳафсаласи пир бўлади, бугунги ўйинимиз ҳам йўқолади. Унда олий лигадаги ўрнимизни сақлаб қолишимиз амри маҳол.

— Биз эса сизларнинг кучлилар сафида қолишингизни истаймиз?
— Истагингиз учун раҳмат. Биз ҳам қараб турмаймиз, мухлислар учун ўйнаймиз, ҳаракат қиламиз.