Бразилия терма жамоаси бош мураббийи Карло Анчелотти жамоанинг Жаҳон чемпионатидаги муваффақиятсизлиги ҳақида фикр билдирди.

«Пентакампеонлар» мундиалдаги иштирокини 1/8 финал босқичида Норвегия терма жамоасига имкониятни бой бериб (1:2) якунлашган эди.

«Менимча, ўйиндаги туб бурилиш нуқтаси сув ичиш учун берилган танаффус бўлди, чунки унгача биз ўйинни тўлиқ назорат қилаётган эдик. Норвегияликлар ўз майдон ярмида тўпни жуда кўп ушлаб туришгани ҳам ҳақиқат — улар Англияга қарши ҳам шу услубда ўйнашди ва ғалаба қозонишлари мумкин эди.

Эҳтимол, менинг хатом шунда бўлгандир: назоратни йўқотдик деб ўйладим, ваҳоланки бундай эмас эди. Мен бир нечта ўзгаришларни амалга оширдим, сўнг Холанн бизга гол урди», — деди Анчелотти ESPN нашрига.

Норвегия терма жамоаси 1/4 финалда қўшимча бўлимларда Англияга мағлуб бўлди (1:2). Турнир ғолиби эса финалда Аргентинани овертаймда мағлуб этган (1:0) Испания терма жамоаси бўлди.