Аргентина терма жамоаси ва Франциянинг «Марсель» клуби дарвозабони Херонимо Рулли фаолиятини «Манчестер Сити»да давом эттириши мумкин. Бу ҳақда журналист Фабрицио Романо хабар берди.
Манбага кўра, «шаҳарликлар» аргентиналик посбонни жамоанинг иккинчи рақамли дарвозабони сифатида Жеймс Траффорд ўрнига олиб келишни режалаштирмоқда. Қайд этилишича, Руллининг ўзи ҳам Англия клубига кўчиб ўтишга қизиқиш билдирмоқда.
34 ёшли дарвозабон ўтган мавсум «Марсель» сафида барча мусобақаларда 39 та учрашувда майдонга тушиб, 52 та гол ўтказиб юборди ҳамда 9 та ўйинда ўз дарвозаси дахлсизлигини сақлаб қолди.
Херонимо Руллининг «Марсел» билан амалдаги шартномаси 2027-йил ёзигача амал қилади.
Transfermarkt маълумотига кўра, аргентиналик дарвозабоннинг трансфер қиймати 6 миллион еврони ташкил этади.
