Франция футбол федерацияси (ФФФ) президенти Филипп Диалло ФИФАнинг жаҳон чемпионатидаги ҳуқуқларнинг бир қисмини хусусий инвесторларга сотиш режаси юзасидан хавотир билдирди.
«Бу кўплаб саволларни келтириб чиқараётган ташвишли лойиҳа. Биз бу ҳақда фақат матбуот орқали билдик ва олдиндан ҳеч қандай маълумот олмаганмиз.
Биз ушбу ташаббуснинг фалсафаси, зарурати, молиявий тузилмаси ва маблағ манбаларини тушунмаяпмиз. Лойиҳа аниқ тафсилотларсиз тақдим этилгани хавотир уйғотмоқда. Ваҳоланки, у футболнинг энг муҳим активларидан бири — дунёдаги энг йирик спорт мусобақаси бўлган жаҳон чемпионатига тааллуқлидир», — деди Диалло.
Эслатиб ўтамиз, аввалроқ ФИФА президенти Жанни Инфантино жаҳон чемпионатидаги ҳуқуқларнинг бир қисмини сотиш режасини ишлаб чиқаётгани ҳақида хабарлар тарқалган эди. Маълумотларга кўра, лойиҳа унга шахсан ўнлаб миллион фунт стерлинг даромад келтириши мумкин.
Шунингдек, музокаралар АҚШ президенти Доналд Трамп маъмуриятига яқин шахслар билан олиб борилгани айтилган. Бир қатор футбол ташкилотлари ва спорт арбоблари ушбу ташаббусни танқид қилган. Бундан ташқари, Инфантино битимни қўллаб-қувватлаш эвазига ФИФАга аъзо ҳар бир мамлакатга 40 миллион АҚШ доллари миқдорида молиявий ёрдам ажратишни таклиф қилгани ҳам хабар қилинган.
