Ўзбекистон Суперлигасининг 15-туридан ўрин олган дастлабки учрашув ўз якунига етди. Унда “Андижон” ўз майдонида пойтахтнинг “Пахтакор” жамоасини қабул қилиб, жанговар голсиз дуранг қайд этди.

Андижондаги “Бобур арена” стадионида ўтган баҳс кескин курашларга бой бўлди. Ўйин давомида ҳар икки жамоа вакиллари ҳисобни очиш учун бир қатор хавфли ҳужумларни ташкил этган бўлса-да, ҳужумларни якунлашда уларга аниқлик ва омад етишмади.

Учрашувнинг сўнгги дақиқалари ўта асабий руҳда ўтди ва ҳакам чўнтагидан кетма-кет қизил карточкалар чиқишига сабаб бўлди. Дастлаб, 80-дақиқада “Андижон” аъзоси Немания Чаласан майдондан четлатилди. Қолган дақиқаларда сон жиҳатдан устунликка эга бўлган тошкентликлар бу имкониятдан фойдалана олишмади. Аксинча, ҳакам томонидан қўшиб берилган вақтда (90+3-дақиқа) мезбонлар таркибидан Мартин Буаке, “Пахтакор”дан эса Муҳаммадрасул Абдумажидов қизил карточка олиб, майдонни эрта тарк этишга мажбур бўлди. Якунда таблода 0:0 ҳисоби ўзгармай қолди.

Ушбу дуранг натижадан сўнг ҳар икки жамоа ўз ҳисобига биттадан очко ёздириб қўйди. Сафардан дуранг билан қайтган “Пахтакор” очколари сонини 34 тага етказди ва турнир жадвалида 35 очко билан пешқадамлик қилаётган “Нефтчи”ни таъқиб қилишда давом этган ҳолда 2-поғонани банд этиб турибди. Ўз уйида бир очкога эга чиққан “Андижон” эса жами очколарини 21 тага етказиб, жадвалнинг 8-ўрнига жойлашди.

Ўзбекистон Суперлигаси, 15-тур
“Андижон” — “Пахтакор” 0:0
Четлатишлар: Немания Чаласан (80, “Андижон”), Мартин Буаке (90+3, “Андижон”), Муҳаммадрасул Абдумажидов (90+3, “Пахтакор”)