«Машъал» — «Сўғдиёна» (1:3) учрашувидан сўнг меҳмонлар бош мураббийи Улуғбек Бақоев матбуот анжуманида иштирок этди.

— Ўйин биз учун жуда яхши бошланди. Дарҳол гол урдик. Биринчи бўлимда ўйинни тўлиқ назорат қилдик, иккинчи бўлимда ҳам вазиятлар яратишда давом этдик. Яна тезкор гол урилди, ундан кейин учинчи гол ҳам келди ва ўйнаш анча енгиллашди.

Биз «Машъал» жамоасини яхши ўрганган эдик. Ўйиндан олдин уларни таҳлил қилганмиз. Улар қарши ҳужумларда, айниқса қанотлар орқали жуда тез ҳаракат қиладиган жамоа.

Кетма-кет иккита мағлубиятдан кейин бугунги ғалаба футболчиларга, аввало, руҳий жиҳатдан катта ишонч берди. Бу натижа турнир жадвалидаги ҳолатимиз учун ҳам муҳим эди.

Шу сабабли йигитларни ғалаба билан табриклайман ва энди Ўзбекистон чемпионатининг навбатдаги учрашувига тайёргарликни давом эттирамиз.

— Биринчи бўлимда «Машъал»нинг илк голи урилганда сиз ён ҳакамга қаттиқ эътироз билдирдингиз. Ҳатто огоҳлантириш ҳам олдингиз. Нима сабабдан айнан ён ҳакамга бунчалик эътироз қилдингиз?

— Мен вазиятни шундай кўрдимки, «Машъал»нинг ҳужуми вақтида уларнинг футболчиси тўпни қўли билан ўйнади. Шу сабабли ўйин тўхтатилиши керак эди.

Аммо ҳакам ўйинни давом эттирди ва натижада «Машъал» гол урди. Мен ҳакамларга айнан шуни айтдим: менинг фикримча, тўп футболчининг қўлига теккан эди. Бу қоидабузарлик ҳисобланади, шунинг учун гол ҳисобга олинмаслиги керак эди. Эътирозимнинг сабаби шу.

— Ёш футболчиларга имконият бериш масаласида, бугун икки нафар ёш футболчини майдонга сўнгги 7–8 дақиқада туширдингиз. Бу уларнинг ўйин амалиёти учун кам эмасми?

— Майдонга тушиш учун аввало футболчи бунга лойиқ эканини исботлаши керак. Кимнинг савияси қандай бўлса, шунга яраша имконият олади.

Бугун айрим футболчиларга дам бердик, айримлари кўпроқ вақт ўйнади. Ёш футболчилар эса кеча ёшлар жамоаси сафида ҳам майдонга тушишганди. Бу одатий жараён.

Албатта, ҳар бир футболчи кўпроқ вақт ўйнашни хоҳлайди. Лекин вазият шундайки, ҳар қандай хато голга сабаб бўлиши мумкин. Футболда эса битта гол ҳам ўйин тақдирини ўзгартириб юбориши мумкин.

Биз рақибни ҳурмат қиламиз, футболни ҳурмат қиламиз. Шу сабабли ортиқча таваккал қилмаймиз ва футболчиларга зарур бўлган вақтни берамиз.

— Дориев билан шартнома қанча муддатга тузилган? У янги мавсумда ҳам жамоада қоладими?

— Яқинда унинг шартномаси узайтирилди. Назаримда, уч ёки тўрт йилга. Аниқ муддатини раҳбарият яхши билади.

Бугунги ўйинини ўзингиз ҳам кўрдингиз. Унинг маҳорати, фидойилиги, майдондаги иштиёқи жуда юқори.

У ёш футболчиларимиз учун ҳақиқий ўрнак. Легионер футболчи қандай ҳаракат қилиши кераклигини амалда кўрсатмоқда.

У гол уради, жамоага фойда келтиради, самарали ўйнайди. Нафақат ўйини, балки руҳий томондан ҳам ёш футболчиларга ёрдам беради ва уларнинг ривожланишига ҳисса қўшади.

Шу сабабли унга алоҳида миннатдорчилик билдираман.