Журналист Рубен Урия ўз YouTube каналида «Атлетико» бош директори Мигель Анхель Хиль Мариннинг ҳужумчи Хулиан Альвареснинг келажаги борасидаги позицияси ҳақида гапириб берди. Функционер аргентиналик футболчини «Барселона» ёки «Реал»га қўйиб юборишдан ҳамон бош тортмоқда.

«Хиль Мариннинг фикрича, «Барселона» ва «Реал» Хулиан Альварес орқали ҳамманинг кўз олдида «Атлетико»ни таҳқирламоқчи бўлишган. Айнан шу сабабли у қатъий позицияни эгаллади ва бу масалани «Атлетико» обрўси ҳамда шахсий ғурури учун шахсий масала сифатида қабул қилди. Шу боис у Хулианнинг ўзига ва унинг агентига футболчи «Барселона» ёки «Реал»га ўтмаслигини маълум қилди», — дейди Уриянинг сўзларини келтирган Goal портали.

26 ёшли Хулиан Альварес нуфузли Transfermarkt портали томонидан 120 миллион еврога баҳоланмоқда.