Бутунжаҳон футболчилар касаба уюшмаси — FIFPRO расмий баёнот бериб, Жанни Инфантино Халқаро футбол ассоциациялари федерацияси (ФИФА) президенти сифатидаги ваколатларини суиистеъмол қилаётганини маълум қилди.
Аввалроқ Инфантино Жаҳон чемпионатига бўлган ҳуқуқларнинг маълум улушини хусусий инвесторларга сотишни режалаштираётгани ҳақида хабарлар тарқалган эди. Кейинчалик эса футбол жамоатчилигининг кескин танқидларидан сўнг у мазкур лойиҳадан воз кечди.
Шундан кейин ФИФА раҳбарияти Марокашда Инфантино ва ташкилот бошқаруви аъзолари иштирокида фавқулодда йиғилиш ўтказди. Шунингдек, ташкилот йўл қўйилган хатолар учун ўз аъзоларидан расман узр сўради.
«Жаҳон чемпионатига эгалик қилиш ва уни бошқариш тизимини бутунлай ўзгартириши, шунингдек, авлодлар давомида футболчилар яратган мусобақани тижоратлаштириши мумкин бўлган режа махфий равишда ишлаб чиқилди, ёпиқ эшиклар ортида муҳокама қилинди ва ФИФА Кенгаши, аъзо ассоциациялар, футболчилар ҳамда футболдаги расман тан олинган манфаатдор томонлар унинг мавжудлигидан хабардор бўлишидан аввал деярли келишиб олинди.
Бу шунчаки бошқарувдаги хато эмас. Бу президентлик ваколатларининг яққол суиистеъмол қилинишидир», — дейилади FIFPRO баёнотида.
