Butunjahon futbolchilar kasaba uyushmasi — FIFPRO rasmiy bayonot berib, Janni Infantino Xalqaro futbol assosiasiyalari federasiyasi (FIFA) prezidenti sifatidagi vakolatlarini suiiste’mol qilayotganini ma’lum qildi.

Avvalroq Infantino Jahon chempionatiga bo‘lgan huquqlarning ma’lum ulushini xususiy investorlarga sotishni rejalashtirayotgani haqida xabarlar tarqalgan edi. Keyinchalik esa futbol jamoatchiligining keskin tanqidlaridan so‘ng u mazkur loyihadan voz kechdi.

Shundan keyin FIFA rahbariyati Marokashda Infantino va tashkilot boshqaruvi a’zolari ishtirokida favqulodda yig‘ilish o‘tkazdi. Shuningdek, tashkilot yo‘l qo‘yilgan xatolar uchun o‘z a’zolaridan rasman uzr so‘radi.

«Jahon chempionatiga egalik qilish va uni boshqarish tizimini butunlay o‘zgartirishi, shuningdek, avlodlar davomida futbolchilar yaratgan musobaqani tijoratlashtirishi mumkin bo‘lgan reja maxfiy ravishda ishlab chiqildi, yopiq eshiklar ortida muhokama qilindi va FIFA Kengashi, a’zo assosiasiyalar, futbolchilar hamda futboldagi rasman tan olingan manfaatdor tomonlar uning mavjudligidan xabardor bo‘lishidan avval deyarli kelishib olindi.

Bu shunchaki boshqaruvdagi xato emas. Bu prezidentlik vakolatlarining yaqqol suiiste’mol qilinishidir», — deyiladi FIFPRO bayonotida.