Аргентина футбол ассоциацияси (AFA) ташкилотнинг навбатдаги конгресси олдидан ФИФА президенти Жанни Инфантинога ўз хайрихоҳлиги ва қўллаб-қувватловини билдирди.

«Биз шаффоф ва барқарор бошқарув модели асосида жаҳон футболининг ривожланиши ва институционал мустаҳкамланишини юқори баҳолаймиз.

Сўнгги воқеалар муносабати билан, ФИФА маъмуриятининг аниқликдан кўра кўпроқ саволлар туғдирган лойиҳани қайтариб олиш ҳақидаги қарорини, шунингдек, йўл қўйилган хатоларнинг тан олиниши ва ФИФАга аъзо сифатида кирувчи барча 211 та ассоциациядан узр сўралганини тўғри қадам деб ҳисоблаймиз. Корпоратив бошқарув тамойилларига риоя қилиш ФИФА, миллий ассоциациялар ва конфедерациялар ўртасидаги ишончнинг асоси бўлиб қолади.

Ишончимиз комилки, Сизнинг раҳбарлигингиз остида ФИФА ўз аъзолари учун янада очиқроқ бўлди, бошқарув шаффофлиги, устав нормалари ва демократик процедураларга ҳурмат эса футбол оиласининг жипслашишига ҳамда футболнинг сифат жиҳатдан барча босқичларда ривожланишига хизмат қилмоқда», — дейилади расмий баёнотда.

Олдинроқ Инфантино Жаҳон чемпионатининг тижорий ҳуқуқлари бир қисмини хусусий инвесторларга сотиш ташаббуси билан чиққан, бироқ кескин танқидлардан сўнг бу ғоядан воз кечган эди. Лойиҳа ФИФАнинг асосий эркаклар ва аёллар турнирларини бошқариши керак бўлган FIFA Forward Enterprise компаниясини ташкил этишни назарда тутган эди.