Қозоғистон футбол федерацияси (КФФ) нидерландиялик 62 ёшли мутахассис Жон ван'т Схип билан миллий терма жамоа бош мураббийлиги бўйича келишувга эришилганини эълон қилди. Раҳбарият Ижроия қўмитаси йиғилишидан сўнг мутахассис билан расмий шартнома имзоланишини маълум қилди.

Футболчилик фаолияти давомида ван'т Схип «Аякс» ва Италиянинг «Женоа» клубларида тўп сурган. У 4 карра Нидерландия чемпиони ва 3 карра мамлакат кубоги соҳиби ҳисобланади. Шунингдек, 1988 йилда Нидерландия терма жамоаси таркибида Европа чемпионлигини қўлга киритган.

Мураббийлик фаолиятида у «Аякс», «Твенте», «Зволле», Мехиконинг «Гвадалахара» ва Австралиянинг «Мельбурн Сити» клубларига устозлик қилган. Бундан ташқари, Греция ҳамда Арманистон миллий терма жамоаларини ҳам бошқарган.