Лондоннинг «Арсенал» клуби ёзги трансфер ойнасида бразилиялик ҳужумчи Габриэл Жезусни сотиш имкониятини кўриб чиқишга тайёр. «Наполи» томонидан билдирилган қизиқишдан сўнг лондонликлар 29 ёшли футболчининг нархини маълум қилди, деб хабар бермоқда Metro.

Манба берган маълумотларга кўра, «канонирлар» форвард учун камида 20 миллион евро талаб қилмоқда. Аҳамиятлиси, Жезуснинг «Арсенал» билан амалдаги шартномаси тугашига атиги бир йил қолган.

Ўтган мавсумда бразилиялик футболчи чап тиззасидаги хочсимон пайларнинг узилиши сабабли бир қатор ўйинларни ўтказиб юборган эди. Мажбурий танаффусдан сўнг сафга қайтиб, у барча турнирларда 27 та ўйинда майдонга тушди ва 6 та гол уришга эришди.

«Наполи» «Арсенал» билан музокараларни бошлаган бўлса-да, томонлар ҳозирча трансфер келишувида сезиларли илгарилашга эриша олишмагани айтилмоқда.