Туриннинг «Ювентус» клуби марказий ҳимоячиси Глейсон Бремер ёзги трансфер ойнасида жамоадан кетмоқчи экани ҳақида тарқалган миш-мишларни инкор этди.
«Бундай нарса ҳеч қачон бўлмаган. Мен бу ерда жуда бахтлиман», — деди Бремер La Gazzetta dello Sport нашрига берган интервьюсида.
Таниқли инсайдер Фабрицио Романонинг маълумотларига кўра, аввалроқ тарқалган хабарларга қарамай, Мюнхеннинг «Бавария» клуби бразилиялик ҳимоячига ҳеч қандай қизиқиш билдирмаган. Немис гранди ушбу ёзда марказий ҳимоя чизиғини кучайтиришни режалаштирмаяпти.
Бремер 2022 йилдан бери Турин клуби шарафини ҳимоя қилиб келмоқда. Унинг «бьянконери» билан амалдаги шартномаси 2029 йилнинг ёзига қадар мўлжалланган бўлиб, марказий ҳимоячининг трансфер қиймати тахминан 35 миллион еврога баҳоланмоқда.
