Turinning «Yuventus» klubi markaziy himoyachisi Gleyson Bremer yozgi transfer oynasida jamoadan ketmoqchi ekani haqida tarqalgan mish-mishlarni inkor etdi.
«Bunday narsa hech qachon bo‘lmagan. Men bu yerda juda baxtliman», — dedi Bremer La Gazzetta dello Sport nashriga bergan intervyusida.
Taniqli insayder Fabrisio Romanoning ma’lumotlariga ko‘ra, avvalroq tarqalgan xabarlarga qaramay, Myunxenning «Bavariya» klubi braziliyalik himoyachiga hech qanday qiziqish bildirmagan. Nemis grandi ushbu yozda markaziy himoya chizig‘ini kuchaytirishni rejalashtirmayapti.
Bremer 2022 yildan beri Turin klubi sharafini himoya qilib kelmoqda. Uning «byankoneri» bilan amaldagi shartnomasi 2029 yilning yoziga qadar mo‘ljallangan bo‘lib, markaziy himoyachining transfer qiymati taxminan 35 million yevroga baholanmoqda.
