Мадриднинг «Реал» клуби дарвозабони Тибо Куртуа жароҳатидан кейин тикланиш жараёнини давом эттириб, «Реал Мадрид Сити» базасида индивидуал машғулотларга қайтди.
Бельгиялик дарвозабон клуб телеканалига берган интервьюсида жамоавий машғулотларга қўшилишдан олдин тўлиқ тайёр ҳолатга келиш мақсадида йиғинни эртароқ бошлаганини айтди.
Куртуа дарвозабонлар учун мўлжалланган дастлабки машғулотини ўтказиб, жисмоний ҳолатидан мамнун эканини билдирди.
«Бугун дарвозабонлар учун машғулот ўтказдим ва ўзимни жуда яхши ҳис қилдим. Машғулотларга қайтганимдан хурсандман», — деди Куртуа.
34 ёшли футболчи жароҳатидан кейин имкон қадар тезроқ тикланиб, жамоа билан навбатдаги машғулотда иштирок этишга тайёр бўлишни мақсад қилганини таъкидлади.
«Реал» айни вақтда янги Ла Лига мавсумига тайёргарлик кўрмоқда. Куртуа чемпионат бошланиши тез яқинлашаётганини ва жамоани мураккаб тақвим кутаётганини қайд этди.
