«Арсенал»нинг янги футболчиси Бруну Гимараэс Лондон клубига ўтганидан сўнг ўз мақсадлари ҳақида гапирди.

«Жуда ҳаяжондаман! Фаолиятимда айнан шундай янги чақирув керак бўлган пайт келди. Совринлар ютиб, клуб тарихига кирмоқчиман. Бунинг учун керакли жойда эканимга ишонаман. Жамоа билан иш бошлашни интиқлик билан кутяпман», — деди бразилиялик ярим ҳимоячи «Арсенал» расмий сайтига.

Гимараэс ўзининг ўйин услуби ҳақида ҳам гапирди.

«Аниқ паслар беришни, кўп ҳаракатланишни ва курашувчан ўйнашни яхши кўраман. Ҳеч қачон таслим бўлмайман. Тўп билан яхши ҳаракат қиламан, хотиржам ва босиқман. Баъзида гол ҳам уришим мумкин. Умид қиламанки, бу ердаги барчани жуда хурсанд қила оламан», — деди у.

28 ёшли футболчи эришган натижалари билан чекланиб қолмоқчи эмаслигини таъкидлади.

«Шу пайтгача эришганларим катта муваффақият, аммо мен янада кўпроқ нарса хоҳлайман. «Арсенал» билан бирга ғалаба қозонишни истайман. Фаолиятимнинг энг яхши даврида яна кўпроқ совринлар ютишга умид қиламан.

Бу жамоага қўшилганимдан хурсандман. Бу футболкада майдонга тушар экансан, ғалаба учун курашишинг ва қўлдан келган барча совринларни ютишга интилишинг керак», — деди Гимараэс.

Бразилиялик ярим ҳимоячи клуб тарихида из қолдиришни асосий мақсадларидан бири сифатида қайд этди.

«Исмимни клуб тарихига ёзиб қолдирмоқчиман. Фаолиятимни якунлаб кетганимдан кейин ҳам бу ерга келадиган футболчилар: “Мен ҳам Бруну клуб учун қилган ишларини қилишни орзу қиламан”, дейишларини хоҳлайман. Футболчининг клуб учун қила оладиган энг яхши иши — тарихга кириш ва ёш авлодга илҳом бериш», — дея қўшимча қилди Гимарайнс.