«Бавария»нинг англиялик ҳужумчиси Харри Кейн яқин орада Мюнхен клуби билан янги меҳнат шартномасини имзолаши кутилмоқда. Бу ҳақда Times Sport хабар бермоқда.

Манбанинг таъкидлашича, шу ҳафтада томонлар янги шартнома бўйича музокараларни бошлашади. Ҳужумчи келишувни 2029 йилгача узайтиришга рози бўлиши кутилмоқда.

Кейн 2023 йилнинг августида «Тоттенхэм»дан ўтганидан бери «Бавария» шарафини ҳимоя қилиб келмоқда. Ўтган мавсумда тўпурар 51 та ўйинда 61 бор рақиблар дарвозасини ишғол қилди. Бундан ташқари, форвард ўз ҳисобига 7 та голли узатмани ҳам ёзиб қўйди.

33 ёшли Кейннинг «Бавария» билан амалдаги шартномаси келгуси йилнинг июнь ойи охирида ўз ниҳоясига етади.