Европа, Шимолий Америка ва Осиё футболи раҳбарияти ФИФА раҳбари Жанни Инфантинони ўз лавозимини тарк этишга чақирди. Бу ҳақда Independent нашри хабар бермоқда.

ФИФА аъзоларининг ярмидан кўпроғини ифодаловчи ушбу конфедерациялар, шунингдек, ташкилотнинг Жаҳон чемпионатидаги улушини хусусий инвесторларга сотишга уриниши бўйича мустақил текширув ўтказишни талаб қилишди.

«Футболдаги раҳбарлик — бу шахсий мулк эмас. У ҳокимиятга эгалик қилиш ёки уни сақлаб қолишга интилишдан иборат эмас. Бу раҳбарларга ўз ваколатларини топширган футбол жамиятига хизмат қилиш мажбуриятидир.

Ишонч алдов йўли билан пучга чиққанида, инсон ўзига ваколат берган жамиятдан ўзини устун қўйганида, ушбу мажбурият унутилган бўлади», — дейилади эълон қилинган матнда.

Хатни УЕФА президенти Александер Чеферин, КОНКАКАФ раҳбари Виктор Монтальяни ва ОФК президенти Салман бин Ибрагим Аль Халифа имзолашган. Низо фонида УЕФА, КОНКАКАФ ва ОФК, агар ФИФА турнирларига бойкот эълон қилинса, қўшма мусобақалар ташкил этиш имкониятини ҳам кўриб чиқишмоқда.

Шу билан бирга, бир қатор миллий ассоциациялар Инфантинони қўллаб-қувватлашда давом этмоқда. Улар орасида Аргентина, Марокаш ва Мексика бор. Африка футбол конфедерацияси (КАФ) ҳам ФИФА президентини бир овоздан қўллаб-қувватлади.