Бразилиялик собиқ футболчи Роналдиньо "Монако" баскетбол клубига инвестор бўлиши мумкин, деб хабар беради L’Equipe нашри.

Манбага кўра, "Монако" бош директори Алексей Ефимов душанба куни кечқурун Роналдиньо ва Андорранинг Clayton Sport инвестиция фондидан мумкин бўлган инвестициялар бўйича хат олди.

Таклиф "Монако" клубни собиқ баскетболчиси Жамал Мэшберн бошчилигидаги консорсиум Helen Holdingsга сотишни якунлаш ниятини очиқчасига тасдиқлаганидан бир неча соат ўтгач пайдо бўлди.

"Монако" ҳозирда Мэшберн гуруҳи билан музокараларни давом эттирмоқда ва Франция лигасига қайтиш учун зарур бўлган молиялаштиришни таъминлашга ҳаракат қилмоқда. Бироқ, Роналдиньонинг потенциал инвестор сифатида пайдо бўлиши воқеалар йўналишини сезиларли даражада ўзгартириши мумкин.

Бу вазият "Монако"нинг 2026/27 йилги Франция лигаси мавсумидан четлатилишига қарши чиқишга уринишлари фонида юзага келмоқда. Клуб Франция Олимпия қўмитасига мурожаат қилмоқчи ва 18 августгача ярашув сўрови учун асосларни тақдим этиши керак.