«Равенна» учун Италия чемпионатидаги янги мавсум бошланиши ўзига хос тарзда ўтади. Клуб махсус маросим ташкил этишни режалаштирган бўлиб, унинг асосий воқеаси афсонавий Роналдиньони таништириш бўлади.

Бразилиялик собиқ футболчи расман «Равенна» ўйинчисига айланган. Бироқ унинг майдонга тушишини кутиш қийин — Роналдиньо клубда асосан вакиллик вазифаларини бажариши кутилмоқда.

Айни пайтда «Равенна» Италия футболида куч жиҳатидан учинчи дивизион ҳисобланган С Серияда иштирок этади.

DerbyDerbyDerby.it маълумотига кўра, Роналдиньонинг расмий тақдимот маросими 20 август куни бўлиб ўтади.

Роналдиньо аввал ҳам Италияда фаолият олиб борган. У 2008–2011 йилларда «Милан» шарафини ҳимоя қилган. Бразилиялик футболчи Италия клубига «Барселона»даги ёрқин фаолиятидан сўнг кўчиб ўтган эди.