"Монако" марказий ҳужумчиси Фоларин Балогун Туркиянинг "Галатасарой" клуби қизиқишлари доирасига тушди. Бу ҳақда инсайдер Николо Скира хабар берди.

Манба маълумотига кўра, Туркия чемпиони жорий трансфер ойнасида "Монако"ни тарк этиши мумкин бўлган футболчига жиддий қизиқиш билдирмоқда.

Аввалроқ Балогун Лондоннинг "Тоттенхэм" клубига ўтишга розилик бергани ҳақида хабар қилинган эди. Бироқ "шпорлар" ҳозирча трансфер шартлари бўйича "Монако" билан келишувга эриша олмади. Шу сабабли "Галатасарой" футболчи учун курашга қўшилиши мумкин.

Балогун ўтган мавсум барча мусобақалар доирасида 43 та учрашувда майдонга тушиб, 19 та гол урди ва 5 та голли узатмани амалга оширди.

Transfermarkt портали 25 ёшли америкалик ҳужумчининг бозор қийматини 50 млн еврога баҳоламоқда.