Tuttosport хабарига кўра, «Ювентус» япониялик дарвозабон Зион Сузукини келаси йилнинг июнига қадар ижарага олиш бўйича «ПСЖ» билан тўлиқ келишувга эришди.

Трансфернинг сўнгги тафсилотларини расмийлаштириш бироз кечикди. Бунга Луис Энрике жамоасининг Зальцбургда УЕФА Суперкубоги финалида «Астон Вилла»га қарши майдонга тушгани сабаб бўлди. «ПСЖ» мутасаддилари ўйин вақтида дарвозабонлардан бири жароҳат олиши эҳтимолини ҳисобга олиб, трансфер ҳақидаги эълонни учрашувдан кейинга қолдиришга қарор қилди.

Энди бу масала ҳал бўлгач, «Пари Сен-Жермен» Сузукини «Парма»дан бонуслар билан бирга 36 миллион евро эвазига тўлиқ сотиб олиш жараёнини якунлайди.

Парижда тиббий кўрикдан ўтиб бўлгач, дарвозабон дам олиш кунлари Туринга йўл олади ва «Ювентус» билан ижара шартномасини имзолайди.

Футболчи ҳам трансферга якуний розилигини берган. Чунки у Францияда қолган тақдирда «ПСЖ» таркибида Матвей Сафоновдан кейинги захира дарвозабони бўлишини тушуниб етган.

Келишувга кўра, Сузукининг маошини «Ювентус» ва «ПСЖ» тенг улушда тўлайди. Бундан ташқари, Европа чемпиони футболчининг келгуси мавсумдаги техник ривожланиши учун «Ювентус»га қўшимча тўлов ҳам амалга оширади.