Tuttosport xabariga ko‘ra, «Yuventus» yaponiyalik darvozabon Zion Suzukini kelasi yilning iyuniga qadar ijaraga olish bo‘yicha «PSJ» bilan to‘liq kelishuvga erishdi.

Transferning so‘nggi tafsilotlarini rasmiylashtirish biroz kechikdi. Bunga Luis Enrike jamoasining Zalsburgda UYEFA Superkubogi finalida «Aston Villa»ga qarshi maydonga tushgani sabab bo‘ldi. «PSJ» mutasaddilari o‘yin vaqtida darvozabonlardan biri jarohat olishi ehtimolini hisobga olib, transfer haqidagi e’lonni uchrashuvdan keyinga qoldirishga qaror qildi.

Endi bu masala hal bo‘lgach, «Pari Sen-Jermen» Suzukini «Parma»dan bonuslar bilan birga 36 million yevro evaziga to‘liq sotib olish jarayonini yakunlaydi.

Parijda tibbiy ko‘rikdan o‘tib bo‘lgach, darvozabon dam olish kunlari Turinga yo‘l oladi va «Yuventus» bilan ijara shartnomasini imzolaydi.

Futbolchi ham transferga yakuniy roziligini bergan. Chunki u Fransiyada qolgan taqdirda «PSJ» tarkibida Matvey Safonovdan keyingi zaxira darvozaboni bo‘lishini tushunib yetgan.

Kelishuvga ko‘ra, Suzukining maoshini «Yuventus» va «PSJ» teng ulushda to‘laydi. Bundan tashqari, Yevropa chempioni futbolchining kelgusi mavsumdagi texnik rivojlanishi uchun «Yuventus»ga qo‘shimcha to‘lov ham amalga oshiradi.