"Коринтианс" Мемфис Депай билан шартномани узайтириш бўйича музокараларни қайта бошлаш имкониятини кўриб чиқмоқда. Клуб раҳбариятининг нидерландиялик футболчи билан хайрлашиш қарори мухлислар орасида кескин норозиликка сабаб бўлди.
Meu Timão маълумотига кўра, президент Осмар Стабиле қароридан сўнг ижтимоий тармоқларда клуб раҳбариятига босим кескин кучайган. "Коринтианс"нинг Депай билан шартномани узайтирмаслик ҳақидаги пости бир сутка ичида 160 мингдан ортиқ изоҳ тўплаган ва уларнинг аксарияти қарорга қарши бўлган.
Вазиятнинг молиявий томони ҳам клубни хавотирга солмоқда. Депай аввал келишилган шартларни клуб бир томонлама бекор қилганини даъво қилиб, ўз манфаатларини ҳимоя қилиш учун чора кўришини билдирган. "Коринтианс" эҳтимолий ҳуқуқий низо натижасида 180 млн реалгача — тахминан 35 млн доллар атрофида тўлов қилиш хавфига дуч келиши мумкин.
Депайнинг таъкидлашича, янги икки йиллик шартнома шартлари клуб президенти, молия ва юридик бўлимлар билан аввалдан келишилган эди. Футболчи ҳатто келишувнинг ўз қисмига имзо қўйган, аммо клуб раҳбарияти якуний босқичда шартномани расмийлаштиришдан воз кечган.
"Коринтианс" ўз қарорини молиявий барқарорликни сақлаш зарурати билан изоҳлаган. Депайнинг аввалги шартномаси 31 июль куни якунланган. Янги келишув икки мавсумга мўлжалланган бўлиб, унда футболчининг маоши ва бонуслари камайтирилиши, шунингдек, клубнинг унга бўлган 42 млн реаллик қарзи қайта тузилиши кўзда тутилган эди.
Ҳомийлар ҳам Депайнинг қолишини истамоқда
Мухлислардан ташқари, "Коринтианс"нинг айрим тижорий ҳамкорлари ҳам вазиятдан норози. Meu Timão'га кўра, ҳомийлар Депайни клуб брендини тарғиб қилишда муҳим фигура деб ҳисобламоқда. Ezze Seguros клуб билан шартномани узайтириш бўйича музокараларни секинлаштирган, бош ҳомий Esportes da Sorte ҳам футболчининг кетиши билан боғлиқ вазиятдан норози томонлар қаторида тилга олинган.
Fatal Fans эса Депайни жамоада сақлаб қолиш учун "Коринтианс"га қўшимча 5 млн реал — қарийб 1 млн доллар — ажратиш таклифини расман киритган. Бу маблағ фақат футболчининг янги шартномаси харажатларини қоплашга йўналтирилиши кўзда тутилган. Натижада компаниянинг клуб билан ҳомийлик келишуви 22 млн реалдан 27 млн реалга ошиши мумкин.
Қўшимча маблағ фақат Депай ва "Коринтианс" янги келишувга эришган тақдирдагина ажратилади.
Депай "Коринтианс"да қандай натижа кўрсатди?
32 ёшли Мемфис Депай "Коринтианс"га 2024 йилда келиб қўшилган. У Бразилия клуби сафида 79 та ўйинда майдонга тушиб, 20 та гол урди. Нидерландиялик ҳужумчи жамоа билан 2025 йилги Бразилия кубоги ва 2026 йилги Бразилия Суперкубогини қўлга киритди.
Ҳозирча томонлар ўртасида музокаралар расман қайта бошлангани йўқ. Бироқ мухлислар босими, ҳомийларнинг позицияси ва эҳтимолий катта миқдордаги суд даъвоси "Коринтианс" раҳбариятини Депай бўйича аввалги қарорини қайта кўриб чиқишга мажбур қилиши мумкин.
