Бугун, 14 август куни футбол бўйича Ўзбекистон Суперлигасининг 17-тур баҳслари давом эттирилади. Кун давомида Наманган, Самарқанд ва Навоийда жами учта учрашув бўлиб ўтади. Ўйинларнинг бошланиш вақтлари 19:00, 20:00 ва 20:30 этиб белгиланган.

Куннинг дастлабки баҳси соат 19:00да Наманганда бошланади. "Навбаҳор" ўз майдонида "Бунёдкор"ни қабул қилади. Айни пайтда наманганликлар 16 ўйиндан 28 очко жамғариб, турнир жадвалида 5-ўринда бормоқда. "Бунёдкор" эса 19 очко билан 11-поғонада.

Бу жамоалар Ўзбекистон чемпионатлари тарихида 41 марта тўқнаш келган. Уларнинг 23 тасида "Бунёдкор", 10 тасида "Навбаҳор" ғалаба қозонган, яна 8 баҳс дуранг билан якунланган.

Соат 20:00да Самарқандда "Динамо" ва "Хоразм" ўзаро баҳс олиб боради. Самарқандликлар 21 очко билан 9-ўринни, урганчликлар эса 19 очко билан 12-поғонани эгаллаб турибди.

"Динамо" ўтган турда "Локомотив"га 1:2 ҳисобида мағлуб бўлди. "Хоразм" эса "Машъал"ни 2:0 ҳисобида енгиб, муҳим уч очкони қўлга киритди. Жамоаларнинг жорий мавсумдаги биринчи ўзаро баҳсида "Хоразм" 2:1 ҳисобида устун келган эди.

Куннинг сўнгги учрашуви соат 20:30да "Қизилқум" ва "Машъал" ўртасида ўтказилади. Бу баҳс турнир жадвалининг қуйи қисмидаги кураш нуқтайи назаридан алоҳида аҳамиятга эга. "Қизилқум" 17 очко билан 14-ўринда, "Машъал" эса 4 очко билан сўнгги — 16-поғонада бормоқда.

Суперлига, 17-тур
14 август:

19:00. "Навбаҳор" — "Бунёдкор"
20:00. "Динамо" — "Хоразм"
20:30. "Қизилқум" — "Машъал"

17-тур 13 август куни бошланган эди. Дастлабки уч учрашувда "Сўғдиёна" "Сурхон"ни 3:1, "Нефтчи" "Андижон"ни 3:0 ҳисобида мағлуб этди, "Бухоро" эса ОКМК устидан 2:0 ҳисобида ғалаба қозонди.