«Барселона» яримҳимоячиси Френки де Йонг бош мураббий Ҳанси Флик билан муносабатлари ёмонлашгани ҳақидаги миш-мишларни рад этди.

Аввалроқ нидерландиялик футболчи ўтган мавсумда Чемпионлар лигасида «Атлетико»га қарши учрашувда майдонга тушишдан бош тортгани ва шундан сўнг мураббий билан муносабатлари совуқлашгани ҳақида хабарлар тарқалган эди.

Де Йонг журналист Жерард Ромеронинг ушбу маълумотларига жавоб қайтарди.

«У мураббий билан муносабатларим жуда ёмон эканини айтди, аммо бу мутлақо ёлғон. Мураббий билан муносабатларим жуда яхши. У билан кўп гаплашаман. Бу ҳақда мураббийнинг ўзидан ҳам сўрашингиз мумкин.

Шунингдек, клуб билан муносабатларим ёмон экани ҳам айтилди. Бу ҳам ҳақиқат эмас. Мен клубдаги одамлар, директорлар ва бошқалар билан кўп мулоқот қиламан. Айтиш мумкинки, клуб билан муносабатларим жуда яхши.

Жерард Ромеро ҳам шу нарсаларни айтди. Уни алоҳида тилга олмоқчиман, чунки у аввал ҳам кўплаб ёлғон маълумотлар тарқатган, деб ўйлайман. Энди эса бунга жим қараб турмайман. У шуни тушуниши керакки, агар ҳақиқатга тўғри келмайдиган нарсаларни эълон қилса, мен бунга очиқ жавоб бераман.

Мен ўзимни қандай ҳис қилаётганим ва сўнгги пайтларда нималар бўлаётганини бироз тушунтириб беришни истадим. Шу орқали ичимдаги ғазабни чиқариб, бутун эътиборимни тикланиш жараёнига қаратишни хоҳлайман», — деди де Йонг.