«Ренн» ҳужумчиси Брэль Эмболо MLS аъзоси «Атланта Юнайтед» клубига ўтишга жуда яқин турибди. Ouest-France нашри хабарига кўра, АҚШ клуби 29 ёшли швейцариялик футболчи учун 17 миллион евродан сал кўпроқ маблағ тўлайди.
Эмболо америкаликлар билан шахсий шартнома шартларини келишиб бўлган. Унинг «Ренн» билан шартномасида ушбу ёз учун аниқ белгиланган товон пули миқдори кўрсатилган эди.
Ўтган мавсумда Эмболо «Ренн» сафида барча турнирларда 34 та ўйинда майдонга тушиб, 10 та гол урган ва 3 та голли узатма муаллифига айланган. Швейцария терма жамоасида эса у 92 та ўйин ўтказиб, 26 бор рақиблар дарвозасини ишғол қилган.
